‘ਕੱਦ 2 ਇੰਚ ਉੱਚਾ, ਮਾਸਕ ਲਾਇਆ, ਗਲੇ ‘ਤੇ ਨਿਸ਼ਾਨ ਨਹੀਂ’, ਕਥਿਤ ਵੀਡੀਓ ਵਿਵਾਦ ‘ਤੇ CM ਮਾਨ ਦੇ ਖੁਲਾਸੇ

ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਅੱਜ ਵੀਰਵਾਰ ਨੂੰ ਮੋਹਾਲੀ ਵਿੱਚ ਆਪਣੇ ਕਥਿਤ ਵਾਇਰਲ ਵੀਡੀਓ ਸਬੰਧੀ ਪ੍ਰੈਸ ਕਾਨਫਰੰਸ ਕਰ ਰਹੇ ਹਨ। ਉਨ੍ਹਾਂ ਵੀਡੀਓ ਨੂੰ ਸਪੱਸ਼ਟ ਕਰਦੇ ਹੋਏ ਕਿਹਾ ਕਿ ਉਹ ਇਸ ਵਿੱਚ ਨਹੀਂ ਹਨ। ਉਨ੍ਹਾਂ ਕਿਹਾ, “ਮੈਨੂੰ ਵੀਡੀਓ ਵਿੱਚ ਮੇਰਾ ਮਾਸਕ ਪਾਇਆ ਹੋਇਆ ਹੈ। ਮੇਰੀ ਗਰਦਨ ‘ਤੇ ਕੋਈ ਨਿਸ਼ਾਨ ਨਹੀਂ ਹਨ। ਉਹ ਨਿਸ਼ਾਨ ਲਗਾਉਣਾ ਭੁੱਲ ਗਏ। ਇਸ ਤੋਂ ਇਲਾਵਾ, ਅੱਖਾਂ ‘ਤੇ ਐਨਕਾਂ ਲਗਾਈਆਂ ਗਈਆਂ ਸਨ, ਕਿਉਂਕਿ ਮਾਸਕ ਅੱਖਾਂ ‘ਤੇ ਨਹੀਂ ਫਿੱਟ ਹੁੰਦੇ।”

ਮੁੱਖ ਮੰਤਰੀ ਨੇ ਕਿਹਾ ਕਿ ਮੈਨੂੰ ਧਾਰਮਿਕ ਤੌਰ ‘ਤੇ ਬਦਨਾਮ ਕਰਨ ਦੀਆਂ ਕੋਸ਼ਿਸ਼ਾਂ ਕੀਤੀਆਂ ਜਾ ਰਹੀਆਂ ਹਨ। ਸਿਆਸੀ ਤੌਰ ‘ਤੇ ਜਵਾਬ ਨਹੀਂ ਦੇ ਪਾ ਰਹੇ, ਇਸ ਲਈ ਅਜਿਹਾ ਕਰ ਰਹੇ ਹਨ। ਜਿੰਨੇ ਕੰਮ ਪੰਜਾਬ ਦੇ ਲੋਕਾਂ ਲਈ ਸਮਾਜਿਕ, ਆਰਥਿਕ ਤੇ ਧਾਰਮਿਕ ਵੀ ਇਸ ਸਰਕਾਰ ਨੇ ਕੀਤੇ ਹਨ, ਕਿਸੇ ਨੇ ਨਹੀਂ ਕੀਤੇ। ਬੇਅਦਬੀ ਕਾਨੂੰਨ ਬਣਾਇਆ। ਪਾਲਕੀ ਸਾਹਿਬ ਦੀ ਗੱਡੀ ਦਾ ਟੈਕਸ ਮਾਫ ਕੀਤਾ। ਸ੍ਰੀ ਆਨੰਦਪੁਰ ਸਾਹਿਬ ਵਿੱਚ ਵਿਧਾਨ ਸਭਾ ਦੀ ਮੀਟਿੰਗ ਵਿਚ ਤਿੰਨ ਸ਼ਹਿਰਾਂ ਨੂੰ ਪਵਿੱਤਰ ਸ਼ਹਿਰ ਦਾ ਦਰਜਾ ਦਿੱਤਾ।

ਉਨ੍ਹਾਂ ਕਿਹਾ ਕਿ ਵੀਡੀਓ ‘ਚ ਮੌਜੂਦ ਵਿਅਕਤੀ ਦਾ ਕੱਦ ਮੇਰੇ ਨਾਲੋਂ 2 ਇੰਚ ਉੱਚਾ ਹੈ। ਉਸ ਵਿਅਕਤੀ ਦਾ ਖੜ੍ਹਨ ਤੇ ਤੁਰਨ ਦਾ ਤਰੀਕਾ ਮੇਰੇ ਨਾਲ ਨਹੀਂ ਮਿਲਦਾ। ਵੀਡੀਓ ‘ਚ ਮੌਜੂਦ ਸ਼ਖਸ ਨੇ ਮਾਸਕ ਲਗਾਇਆ ਹੈ ਤੇ ਵੀਡੀਓ ‘ਚ ਮੌਜੂਦ ਵਿਅਕਤੀ ਦੇ ਗਲੇ ‘ਤੇ ਆਪ੍ਰੇਸ਼ਨ ਦਾ ਨਿਸ਼ਾਨ ਨਹੀਂ ਹੈ ਜੋਕਿ ਮੇਰੇ ਹੈ। ਉਹ ਨਿਸ਼ਾਨ ਲਾਉਣਾ ਭੁੱਲ ਗਏ। ਉਨ੍ਹਾਂ ਕਿਹਾ ਕਿ ਮੈਂ 2016 ਤੋਂ ਬਾਅਦ ਕੈਨੇਡਾ ਹੀ ਨਹੀਂ ਗਿਆ। ਇਹ ਵੀਡੀਓ ਸ੍ਰੀ ਅਕਾਲ ਤਖਤ ਸਾਹਿਬ ਨੂੰ ਵੀ ਭੇਜਾਂਗੇ। ਉਨ੍ਹਾਂ ਕਿਹਾ ਕਿ ਆਉਣ ਵਾਲੇ ਦਿਨਾਂ ਚ ਦੱਸਾਂਗੇ ਕਿ ਇਸ ਵੀਡੀਓ ਪਿੱਛੇ ਕੌਣ ਹੈ?

CM ਮਾਨ ਨੇ ਕਿਹਾ ਕਿ ਵਿਰੋਧੀ ਰਾਜਨੀਤਿਕ ਰੂਪ ਨਾਲ ਮੇਰਾ ਮੁਕਾਬਲਾ ਨਹੀਂ ਕਰ ਸਕਦੇ, ਇਸ ਲਈ ਰਲ ਕੇ ਮੈਨੂੰ ਟਾਰਗੇਟ ਬਣਾ ਰਹੇ ਹਨ, ਤਾਂਜੋ ਪੰਜਾਬ ਦੇ ਲੋਕ ਮੈਨੂੰ ਨਫਰਤ ਕਰ ਸਕਣ ਪਰ ਇਹ ਸੰਭਵ ਨਹੀਂ ਹੋਵੇਗਾ ਕਿਉਂਕਿ ਪੰਜਾਬ ਦੇ ਲੋਕ ਮੇਰੇ ਨਾਲ ਨੇ।