‘ਉਹ ਪੰਜਾਬ ਦੀ ਆਵਾਜ਼ ਸੀ…’, ਰਾਹੁਲ ਗਾਂਧੀ ਨੇ ਰੈਲੀ ਦੌਰਾਨ ਸਿੱਧੂ ਮੂਸੇਵਾਲਾ ਦਾ ਕੀਤਾ ਜ਼ਿਕਰ

ਬੁੱਧਵਾਰ ਨੂੰ ਸੰਗਰੂਰ ਵਿੱਚ ਕਾਂਗਰਸ ਪਾਰਟੀ ਦੀ “ਇਨਸਾਫ਼ ਰੈਲੀ” ਨੂੰ ਸੰਬੋਧਨ ਕਰਦਿਆਂ ਲੋਕ ਸਭਾ ਵਿੱਚ ਵਿਰੋਧੀ ਧਿਰ ਦੇ ਨੇਤਾ ਰਾਹੁਲ ਗਾਂਧੀ ਨੇ ਇੱਕ ਵਾਰ ਫਿਰ ਪ੍ਰਧਾਨ ਮੰਤਰੀ ਮੋਦੀ ‘ਤੇ ਹਮਲਾ ਬੋਲਿਆ। ਰਾਹੁਲ ਗਾਂਧੀ ਨੇ ਕਿਹਾ, “ਕੱਲ੍ਹ, ਮੈਂ ਨਰਿੰਦਰ ਮੋਦੀ ਨੂੰ ਸਿੱਧਾ ਚੁਣੌਤੀ ਦਿੱਤੀ ਸੀ। ਉਹ ਕਿਤੇ ਵੀ ਆ ਸਕਦੇ ਹਨ ਅਤੇ ਮੇਰੇ ਨਾਲ ਬਹਿਸ ਕਰ ਸਕਦੇ ਹਨ। ਉਹ ਕਿਸੇ ਨੂੰ ਵੀ ਜੱਜ ਵਜੋਂ ਚੁਣ ਸਕਦੇ ਹਨ; ਬਹਿਸ ਕਿਤੇ ਵੀ ਹੋ ਸਕਦੀ ਹੈ। ਮੈਂ ਗਾਰੰਟੀ ਦਿੰਦਾ ਹਾਂ ਕਿ ਨਰਿੰਦਰ ਮੋਦੀ ਵਿੱਚ ਮੇਰੇ ਸਾਹਮਣੇ ਬੈਠਣ ਦੀ ਹਿੰਮਤ ਨਹੀਂ ਹੋਵੇਗੀ।”

ਆਪਣੇ ਸੰਬੋਧਨ ਦੌਰਾਨ ਰਾਹੁਲ ਗਾਂਧੀ ਨੇ ਪੰਜਾਬ ਵਿੱਚ ਨਸ਼ੀਲੇ ਪਦਾਰਥਾਂ ਦੀ ਦੁਰਵਰਤੋਂ ਅਤੇ ਅਪਰਾਧ ਦੇ ਮੁੱਦਿਆਂ ਬਾਰੇ ਵੀ ਇੱਕ ਅਹਿਮ ਗੱਲ ਕਹੀ। ਕਾਂਗਰਸ ਸੰਸਦ ਮੈਂਬਰ ਨੇ ਕਿਹਾ ਉਨ੍ਹਾਂ ਕਿਹਾ ਕਿ ਸਿੱਧੂ ਮੂਸੇਵਾਲਾ ਡਾਇਨਾਮਿਕ, ਟੈਲੰਟਡ ਨੌਜਵਾਨ ਸੀ, ਮੂਸੇਵਾਲਾ ਦੇ ਅੰਦਰ ਪੰਜਾਬ ਦੀ ਆਵਾਜ਼ ਸੀ। ਸਭ ਦੇ ਸਾਹਮਣੇ ਮੂਸੇਵਾਲਾ ਦੀ ਸਕਿਓਰਿਟੀ ਹਟਾਈ ਗਈ ਸੀ, ਸਿੱਧੂ ਮੂਸੇਵਾਲਾ ਦਾ ਦਿਨ-ਦਿਹਾੜੇ ਕਤਲ ਹੋਇਆ ਸੀ, ਜੋ ਮੂਸੇਵਾਲਾ ਨਾਲ ਹੋਇਆ ਉਹ ਅੱਜ ਪੰਜਾਬ ਵਿਚ ਫੈਸ਼ਨ ਹੋ ਗਿਆ।

ਉਹੀ ਮਾਨਸਿਕਤਾ ਜਿਸਨੇ ਸਿੱਧੂ ਮੂਸੇਵਾਲਾ ਨੂੰ ਦਿਨ-ਦਿਹਾੜੇ ਗੋਲੀ ਮਾਰ ਕੇ ਕਤਲ ਕਰਨ ਵਾਲਿਆਂ ਨੂੰ ਹੌਸਲਾ ਵਧਾਇਆ ਸੀ, ਹੁਣ ਪੰਜਾਬ ਦੇ ਹਰ ਕੋਨੇ ਵਿੱਚ ਫੈਲ ਰਹੀ ਹੈ। ਹਰ ਪਾਸੇ ਅਪਰਾਧ ਫੈਲਿਆ ਹੋਇਆ ਹੈ। ਜੋ ਵੀ ਪ੍ਰਤਿਭਾਸ਼ਾਲੀ ਹੈ, ਜੋ ਆਪਣੇ ਹੁਨਰ ਦੇ ਆਧਾਰ ‘ਤੇ ਅੱਗੇ ਵਧਣਾ ਚਾਹੁੰਦਾ ਹੈ, ਅਤੇ ਜੋ ਪੰਜਾਬ ਅਤੇ ਦੇਸ਼ ਲਈ ਕੁਝ ਕਰਨਾ ਚਾਹੁੰਦਾ ਹੈ, ਉਸਨੂੰ ਧਮਕੀਆਂ ਦਿੱਤੀਆਂ ਜਾਂਦੀਆਂ ਹਨ, ਡਰਾਇਆ ਜਾਂਦਾ ਹੈ ਅਤੇ ਅਖੀਰ ਵਿੱਚ ਸਾਰਿਆਂ ਦੇ ਸਾਹਮਣੇ ਗੋਲੀ ਮਾਰ ਦਿੱਤੀ ਜਾਂਦੀ ਹੈ।”

ਰਾਹੁਲ ਗਾਂਧੀ ਨੇ ਕਿਹਾ, “ਮੈਂ ਕਈ ਸਾਲ ਪਹਿਲਾਂ ਪੰਜਾਬ ਆਇਆ ਸੀ ਅਤੇ ਚੇਤਾਵਨੀ ਦਿੱਤੀ ਸੀ ਕਿ ਇਥੇ ਨਸ਼ੇ ਦੀ ਸਮੱਸਿਆ ਫੈਲ ਰਹੀ ਹੈ। ਪੂਰੀ ਵਿਰੋਧੀ ਧਿਰ ਨੇ ਦਾਅਵਾ ਕੀਤਾ ਸੀ ਕਿ ਮੈਨੂੰ ਪੰਜਾਬ ਬਾਰੇ ਕੁਝ ਨਹੀਂ ਪਤਾ ਅਤੇ ਨਾ ਹੀ ਉੱਥੇ ਨਸ਼ੇ ਦੀ ਅਜਿਹੀ ਕੋਈ ਸਮੱਸਿਆ ਹੈ। ਪੰਜਾਬ ਦੇ ਹਰ ਬੰਦੇ ਨੂੰ ਇੱਕ ਗੱਲ ਸਮਝਣ ਦੀ ਲੋੜ ਹੈ: ਇਸ ਸੂਬੇ ਵਿੱਚ ਉਦਯੋਗ, ਫੈਕਟਰੀਆਂ ਅਤੇ ਖੇਤੀਬਾੜੀ ਹੋਣੀ ਚਾਹੀਦੀ ਹੈ। ਜੇਕਰ ਇਹ ਨਹੀਂ ਹੋਣਗੇ, ਤਾਂ ਫਿਰ ਨਸ਼ੇ ਦੀ ਲਤ, ਗੈਂਗਸਟਰਾਂ ਦਾ ਬੋਲਬਾਲਾ ਅਤੇ ਸੜਕਾਂ ‘ਤੇ ਗੋਲੀਬਾਰੀ ਵੇਖਣ ਨੂੰ ਮਿਲੇਗੀ।”

ਇਸ ਤੋਂ ਪਹਿਲਾਂ, “ਇਨਸਾਫ਼ ਰੈਲੀ” ਨੂੰ ਸੰਬੋਧਨ ਕਰਦੇ ਹੋਏ, ਕਾਂਗਰਸ ਪ੍ਰਧਾਨ ਮੱਲਿਕਾਰਜੁਨ ਖੜਗੇ ਨੇ ਕਿਹਾ, “ਜੇਕਰ ਅਸੀਂ ਪੰਜਾਬ ਜਿੱਤਦੇ ਹਾਂ, ਤਾਂ ਅਸੀਂ ਸਾਰਾ ਭਾਰਤ ਜਿੱਤਾਂਗੇ – ਇਹ ਮੇਰਾ ਦਾਅਵਾ ਹੈ। ਜਿੱਤ ਇੱਥੋਂ ਸ਼ੁਰੂ ਹੋਣੀ ਚਾਹੀਦੀ ਹੈ, ਅਤੇ ਇਸ ਨੂੰ ਹਾਸਲ ਕਰਨ ਲਈ ਸਾਨੂੰ ਸਾਰਿਆਂ ਨੂੰ ਇੱਕਜੁੱਟ ਰਹਿਣਾ ਹੋਵੇਗਾ।”