ਮੇਰੇ ਮਨ ‘ਚ ਦਿਲਜੀਤ ਲਈ ਹੁਣ ਉਹ ਇਜ਼ੱਤ ਨਹੀਂ ਰਹੀ, ‘ਸਤਲੁਜ’ ਫਿਲਮ ਨੂੰ ਲੈ ਕੇ ਬੋਲੇ ਰਵਨੀਤ ਬਿੱਟੂ

ਕੇਂਦਰੀ ਮੰਤਰੀ ਰਵਨੀਤ ਬਿੱਟੂ ਦਾ ਜਸਵੰਤ ਸਿੰਘ ਖਾਲੜਾ ਦੇ ਜੀਵਨ ‘ਤੇ ਆਧਾਰਿਤ ਫਿਲਮ ‘ਸਤਲੁਜ’ ਨੂੰ ਲੈ ਕੇ ਇੱਕ ਵਾਰ ਫਿਰ ਵੱਡਾ ਬਿਆਨ ਸਾਹਮਣੇ ਆਇਆ ਹੈ। ਬਿੱਟੂ ਨੇ ਕਿਹਾ ਕਿ ਮੇਰੇ ਮਨ ‘ਚ ਦਿਲਜੀਤ ਦੋਸਾਂਝ ਲਈ ਹੁਣ ਉਹ ਇਜ਼ੱਤ ਨਹੀਂ ਰਹੀ। ਹੋ ਸਕਦਾ ਹੈ ਦਿਲਜੀਤ ਨੇ ਪ੍ਰੈਸ਼ਰ ‘ਚ ਫ਼ਿਲਮ ‘ਸਤਲੁਜ’ ਨੂੰ ਜਲਦਬਾਜ਼ੀ ‘ਚ ਰਿਲੀਜ਼ ਕੀਤਾ ਹੋਵੇ ਪਰ ਸਤਲੁਜ ਫ਼ਿਲਮ ‘ਚ ਦਿਲਾਵਰ ਸਿੰਘ ਵਾਲਾ ਪਾਰਟ ਬਿਲਕੁਲ ਗਲਤ ਹੈ। ਖਾਲੜਾ ਕੇਸ ਨਾਲ ਦਿਲਾਵਰ ਸਿੰਘ ਦਾ ਕੋਈ ਲੈਣਾ-ਦੇਣਾ ਹੀ ਨਹੀਂ ਹੈ। 

ਕੇਂਦਰੀ ਮੰਤਰੀ ਨੇ ਦੋਸ਼ ਲਾਇਆ ਕਿ ਫਿਲਮ ਦਾ ਚਿੱਤਰਣ ਗਲਤ ਹੈ ਅਤੇ ਇਸ ਦੇ ਦਾਅਵੇ “100 ਪ੍ਰਤੀਸ਼ਤ ਗੁੰਮਰਾਹਕੁੰਨ” ਹਨ। ਉਨ੍ਹਾਂ ਕਿਹਾ ਕਿ ਦਿਲਜੀਤ ਦੋਸਾਂਝ ਲਈ ਮੇਰੇ ਮਨ ਵਿਚ ਹੁਣ ਕੋਈ ਇੱਜ਼ਤ ਨਹੀਂ, ਉਹ ਜ਼ਰੂਰ ਕਿਸੇ ਪ੍ਰਭਾਵ ਹੇਠ ਆਇਆ ਹੋਵੇਗਾ ਜਿਸ ਕਰਕੇ ਉਹ ਇਸ ਫਿਲਮ ਨੂੰ ਕਰਨ ਲਈ ਸਹਿਮਤ ਹੋ ਗਿਆ। ਉਨ੍ਹਾਂ ਕਿਹਾ ਕਿ ਇਹ ਫਿਲਮ ਪੰਜਾਬ ਦੇ ਇਤਿਹਾਸ ਦਾ ਸਿਰਫ ਇੱਕ ਪੱਖ ਪੇਸ਼ ਕਰਦੀ ਹੈ ਅਤੇ ਬਗਾਵਤ ਦੌਰਾਨ ਪੁਲਿਸ ਕਰਮਚਾਰੀਆਂ, ਸਿਆਸੀ ਨੇਤਾਵਾਂ ਅਤੇ ਨਾਗਰਿਕਾਂ ਦੁਆਰਾ ਕੀਤੀਆਂ ਕੁਰਬਾਨੀਆਂ ਨੂੰ ਢੁਕਵੇਂ ਢੰਗ ਨਾਲ ਸਵੀਕਾਰ ਨਹੀਂ ਕਰਦੀ ਹੈ।

ਨਵੀਂ ਦਿੱਲੀ ਵਿੱਚ ਇੱਕ ਪ੍ਰੈਸ ਕਾਨਫਰੰਸ ਵਿੱਚ ਬੋਲਦਿਆਂ ਬਿੱਟੂ ਨੇ ਕਿਹਾ ਕਿ ਉਨ੍ਹਾਂ ਨੂੰ ਖਾਲੜਾ ‘ਤੇ ਫਿਲਮ ਬਣਨ ‘ਤੇ ਕੋਈ ਇਤਰਾਜ਼ ਨਹੀਂ ਹੈ ਪਰ ਇਸ ਵਿੱਚ ਪੇਸ਼ ਕੀਤੇ ਗਏ ਇਤਿਹਾਸਕ ਦਾਅਵੇ ਤੱਥਾਂ ਮੁਤਾਬਕ ਸਹੀ ਹੋਣੇ ਚਾਹੀਦੇ ਹਨ। ਬਿੱਟੂ ਨੇ ਇਹ ਵੀ ਅਪੀਲ ਕੀਤੀ ਕਿ ਸ੍ਰੀ ਅਕਾਲ ਤਖ਼ਤ ਸਾਹਿਬ ਵੱਲੋਂ ਐਲਾਨੀ ਗਈ ਅਰਦਾਸ ਕਿਸੇ ਇੱਕ ਸ਼੍ਰੇਣੀ ‘ਤੇ ਕੇਂਦ੍ਰਿਤ ਕਰਨ ਦੀ ਬਜਾਏ, ਸੰਘਰਸ਼ ਦੇ ਸਾਰੇ ਪੀੜਤਾਂ, ਪੁਲਿਸ ਕਰਮਚਾਰੀਆਂ, ਹਿੰਦੂਆਂ ਅਤੇ ਸਿੱਖਾਂ ਸਮੇਤ ਨੂੰ ਯਾਦ ਕਰੇ। 

ਇਸ ਤੋਂ ਪਹਿਲਾਂ ਕੇਂਦਰੀ ਮੰਤਰੀ ਨੇ ਫਿਲਮ ਵਿੱਚ ਉਜਾਗਰ ਕੀਤੀਆਂ ਗਈਆਂ 25,000 ਅਣਪਛਾਤੀਆਂ ਲਾਸ਼ਾਂ ਦੇ ਅੰਕੜੇ ਲਈ ਦਸਤਾਵੇਜ਼ੀ ਸਬੂਤ ਮੰਗੇ ਸਨ ਅਤੇ ਚਿਤਾਵਨੀ ਦਿੱਤੀ ਸੀ ਕਿ ਜੇਕਰ ਅਜਿਹੇ ਦਾਅਵਿਆਂ ਨੂੰ ਸਾਬਤ ਨਹੀਂ ਕੀਤਾ ਜਾ ਸਕਦਾ ਤਾਂ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ।

ਦੱਸ ਦੇਈਏ ਕਿ ਇਸ ਤੋਂ ਪਹਿਲਾਂ ਪੰਜਾਬ ਭਾਜਪਾ ਦੇ ਪ੍ਰਧਾਨ ਕੇਵਲ ਸਿੰਘ ਢਿੱਲੋਂ ਨੇ ਪਹਿਲਾਂ ਇੱਕ ਵੱਖਰਾ ਰੁਖ਼ ਅਪਣਾਇਆ ਸੀ। ਉਨ੍ਹਾਂ ਕਿਹਾ ਸੀ ਕਿ OTT ਪਲੇਟਫਾਰਮਾਂ ਤੋਂ ਫਿਲਮ ਨੂੰ ਹਟਾਉਣ ਦੀਆਂ ਮੰਗਾਂ ਦੀ ਜਾਂਚ ਕਰਨ ਲਈ ਇੱਕ ਕਮੇਟੀ ਬਣਾਈ ਗਈ ਸੀ, ਜਦੋਂ ਕਿ ਇਹ ਕਿਹਾ ਸੀ ਕਿ “ਸੱਚ ਦਿਖਾਉਣ ਵਿੱਚ ਕੁਝ ਵੀ ਗਲਤ ਨਹੀਂ ਹੈ”।