IPL 2026 : ਨਵਾਂ ਸੀਜ਼ਨ ਨਵੀਂ ਜਰਸੀ, ਪੰਜਾਬ ਕਿੰਗਸ ਨੇ ਬਦਲੀ ਡ੍ਰੈੱਸ, ਡਿਜ਼ਾਈਨ ‘ਚ ਟੀਮ ਦੀ ਤਾਕਤ ਦਾ ਪ੍ਰਤੀਕ

IPL 2026 ਦੇ ਪਹਿਲੇ ਪੜਾਅ ਦਾ ਸ਼ਡਿਊਲ ਜਾਰੀ ਕਰ ਦਿੱਤਾ ਗਿਆ ਹੈ। ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (ਬੀਸੀਸੀਆਈ) ਨੇ ਬੁੱਧਵਾਰ ਨੂੰ 19ਵੇਂ ਸੀਜ਼ਨ ਦੇ ਸ਼ੁਰੂਆਤੀ ਮੈਚਾਂ ਦਾ ਸ਼ਡਿਊਲ ਐਲਾਨ ਕੀਤਾ। ਦੁਨੀਆ ਦੀ ਸਭ ਤੋਂ ਮਸ਼ਹੂਰ ਟੀ-20 ਫ੍ਰੈਂਚਾਇਜ਼ੀ ਲੀਗ ਦਾ ਇਹ ਸੀਜ਼ਨ 28 ਮਾਰਚ ਨੂੰ ਸ਼ੁਰੂ ਹੋਵੇਗਾ, ਜਿਸ ਦੇ ਪਹਿਲੇ ਪੜਾਅ ਦੇ ਮੈਚ 12 ਅਪ੍ਰੈਲ ਤੱਕ ਖੇਡੇ ਜਾਣਗੇ।

ਪੰਜਾਬ ਕਿੰਗਜ਼ ਨੇ ਆਉਣ ਵਾਲੇ ਇੰਡੀਅਨ ਪ੍ਰੀਮੀਅਰ ਲੀਗ (ਆਈਪੀਐਲ) 2026 ਸੀਜ਼ਨ ਲਈ ਆਪਣੀ ਨਵੀਂ ਮੈਚ ਜਰਸੀ ਦੀ ਘੁੰਡ-ਚੁਕਾਈ ਕੀਤੀ ਹੈ। ਨਵੀਂ ਜਰਸੀ ਵਿੱਚ ਪੰਜਾਬ ਕਿੰਗਜ਼ ਦੇ ਰਵਾਇਤੀ ਦਸਤਖਤ ਰੰਗਾਂ ਲਾਲ ਅਤੇ ਨੀਲੇ ਦਾ ਇੱਕ ਆਕਰਸ਼ਕ ਸੁਮੇਲ ਹੋਵੇਗਾ। ਜਰਸੀ ਦੇ ਡਿਜ਼ਾਈਨ ਵਿੱਚ ਟੀਮ ਦਾ ਪ੍ਰਤੀਕ, ਸ਼ੇਰ ਪ੍ਰਮੁੱਖਤਾ ਨਾਲ ਦਿਖਾਇਆ ਗਿਆ ਹੈ, ਜੋ ਟੀਮ ਦੀ ਤਾਕਤ ਅਤੇ ਲੜਾਈ ਦੀ ਭਾਵਨਾ ਦਾ ਪ੍ਰਤੀਕ ਹੈ।

ਪੰਜਾਬ ਕਿੰਗਜ਼ ਦੇ ਖਿਡਾਰੀ ਆਈਪੀਐਲ 2026 ਦੌਰਾਨ ਇਸ ਨਵੀਂ ਜਰਸੀ ਵਿੱਚ ਖੇਡਦੇ ਨਜ਼ਰ ਆਉਣਗੇ। ਟੀਮ ਪ੍ਰਬੰਧਨ ਦੇ ਅਨੁਸਾਰ, ਜਰਸੀ ਦਾ ਡਿਜ਼ਾਈਨ ਟੀਮ ਦੀ ਪਛਾਣ ਅਤੇ ਪੰਜਾਬ ਦੀ ਊਰਜਾ ਨੂੰ ਦਰਸਾਉਣ ਲਈ ਤਿਆਰ ਕੀਤਾ ਗਿਆ ਹੈ। ਨਵੀਂ ਜਰਸੀ ਦੇ ਨਾਲ ਟੀਮ ਦੇ ਕੈਪਟਨ ਸ਼੍ਰੇਅਸ ਅਈਅਰ ਦੀ ਤਸਵੀਰ ਵੀ ਜਾਰੀ ਕੀਤੀ ਗਈ ਹੈ।

ਦੱਸ ਦੇਈਏ ਕਿ ਟੂਰਨਾਮੈਂਟ ਦਾ ਪਹਿਲਾ ਮੈਚ 28 ਮਾਰਚ ਨੂੰ ਬੰਗਲੁਰੂ ਦੇ ਐਮ. ਚਿੰਨਾਸਵਾਮੀ ਸਟੇਡੀਅਮ ਵਿੱਚ ਖੇਡਿਆ ਜਾਵੇਗਾ, ਜਿੱਥੇ ਮੌਜੂਦਾ ਚੈਂਪੀਅਨ ਰਾਇਲ ਚੈਲੇਂਜਰਜ਼ ਬੰਗਲੁਰੂ (ਆਰ.ਸੀ.ਬੀ.) ਦਾ ਸਾਹਮਣਾ ਸਨਰਾਈਜ਼ਰਜ਼ ਹੈਦਰਾਬਾਦ (ਐਸ.ਆਰ.ਐਚ.) ਨਾਲ ਹੋਵੇਗਾ। ਆਰ.ਸੀ.ਬੀ. ਇਸ ਵਾਰ ਆਪਣੇ ਖਿਤਾਬ ਦਾ ਬਚਾਅ ਕਰੇਗੀ। ਆਰ.ਸੀ.ਬੀ. ਨੇ 2025 ਵਿੱਚ ਪੰਜਾਬ ਕਿੰਗਜ਼ ਨੂੰ ਹਰਾ ਕੇ ਆਪਣਾ ਪਹਿਲਾ ਆਈ.ਪੀ.ਐਲ. ਖਿਤਾਬ ਜਿੱਤਿਆ ਸੀ। ਉਦਘਾਟਨੀ ਮੈਚ ਤੋਂ ਅਗਲੇ ਦਿਨ ਐਤਵਾਰ ਨੂੰ ਮੁੰਬਈ ਇੰਡੀਅਨਜ਼ ਅਤੇ ਕੋਲਕਾਤਾ ਨਾਈਟ ਰਾਈਡਰਜ਼ ਵਿਚਕਾਰ ਮੈਚ ਮੁੰਬਈ ਦੇ ਵਾਨਖੇੜੇ ਸਟੇਡੀਅਮ ਵਿੱਚ ਖੇਡਿਆ ਜਾਵੇਗਾ।

ਪਹਿਲੇ ਪੜਾਅ ਵਿੱਚ 20 ਮੈਚ, 10 ਸ਼ਹਿਰਾਂ ਵਿੱਚ ਮੈਚ

• ਪਹਿਲੇ ਪੜਾਅ ਵਿੱਚ ਕੁੱਲ 20 ਮੈਚ ਖੇਡੇ ਜਾਣਗੇ। ਇਹ ਮੈਚ 10 ਵੱਖ-ਵੱਖ ਸ਼ਹਿਰਾਂ ਵਿੱਚ ਹੋਣਗੇ।
• ਇਨ੍ਹਾਂ ਵਿੱਚ ਬੰਗਲੁਰੂ, ਮੁੰਬਈ, ਗੁਹਾਟੀ, ਨਵਾਂ ਚੰਡੀਗੜ੍ਹ, ਲਖਨਊ, ਕੋਲਕਾਤਾ, ਚੇਨਈ, ਦਿੱਲੀ, ਅਹਿਮਦਾਬਾਦ ਅਤੇ ਹੈਦਰਾਬਾਦ ਸ਼ਾਮਲ ਹਨ।
• ਇਸ ਸਮੇਂ ਦੌਰਾਨ ਚਾਰ ਡਬਲ-ਹੈਡਰ ਵੀ ਹੋਣਗੇ।
• ਇੱਕ ਡਬਲ-ਹੈਡਰ ਦੌਰਾਨ, ਇੱਕੋ ਦਿਨ ਦੋ ਮੈਚ ਖੇਡੇ ਜਾਣਗੇ।
• ਦੁਪਹਿਰ ਦਾ ਮੈਚ ਭਾਰਤੀ ਸਮੇਂ ਮੁਤਾਬਕ ਦੁਪਹਿਰ 3.30 ਵਜੇ ਸ਼ੁਰੂ ਹੋਵੇਗਾ ਅਤੇ ਸ਼ਾਮ ਦਾ ਮੈਚ ਭਾਰਤੀ ਸਮੇਂ ਮੁਤਾਬਕ ਸ਼ਾਮ 7.30 ਵਜੇ ਸ਼ੁਰੂ ਹੋਵੇਗਾ।
• ਰਾਇਲ ਚੈਲੇਂਜਰਜ਼ ਬੰਗਲੌਰ ਵਿੱਚ ਪੰਜ ਘਰੇਲੂ ਮੈਚ ਅਤੇ ਰਾਏਪੁਰ ਵਿੱਚ ਦੋ ਮੈਚ ਖੇਡੇਗਾ।
• ਪੰਜਾਬ ਕਿੰਗਜ਼ ਨਵੇਂ ਚੰਡੀਗੜ੍ਹ ਵਿੱਚ ਚਾਰ ਘਰੇਲੂ ਮੈਚ ਅਤੇ ਧਰਮਸ਼ਾਲਾ ਵਿੱਚ ਤਿੰਨ ਮੈਚ ਖੇਡੇਗਾ।
• ਰਾਜਸਥਾਨ ਰਾਇਲਜ਼ ਗੁਹਾਟੀ ਵਿੱਚ ਤਿੰਨ ਘਰੇਲੂ ਮੈਚ ਅਤੇ ਜੈਪੁਰ ਵਿੱਚ ਚਾਰ ਮੈਚ ਖੇਡੇ ਜਾਣਗੇ।