ਮੁੱਲਾਂਪੁਰ ਟੈਸਟ ‘ਚ ਟੀਮ ਇੰਡੀਆ ਦੀ ਵੱਡੀ ਜਿੱਤ, ਤੀਜੇ ਦਿਨ ਹੀ ਹਾਰਿਆ ਅਫਗਾਨਿਸਤਾਨ

ਮੁੱਲਾਂਪੁਰ ਦੇ ਮਹਾਰਾਜਾ ਯਾਦਵਿੰਦਰ ਸਿੰਘ ਅੰਤਰਰਾਸ਼ਟਰੀ ਕ੍ਰਿਕਟ ਸਟੇਡੀਅਮ ਵਿੱਚ ਭਾਰਤ ਅਤੇ ਅਫਗਾਨਿਸਤਾਨ ਵਿਚਕਾਰ ਹੋਏ ਟੈਸਟ ਮੈਚ ਮੁਕਬਾਲੇ ਨੂੰ ਭਾਰਤੀ ਟੀਮ ਨੇ ਪਾਰੀ ਤੇ 300 ਦੌੜਾਂ ਨਾਲ ਜਿੱਤਿਆ। ਮੈਚ ਤੀਜੇ ਦਿਨ (8 ਜੂਨ) ਦੇ ਤੀਜੇ ਸੈਸ਼ਨ ਵਿੱਚ ਖਤਮ ਹੋਇਆ। ਇਹ ਟੈਸਟ ਕ੍ਰਿਕਟ ਵਿੱਚ ਭਾਰਤ ਦੀ ਸਭ ਤੋਂ ਵੱਡੀ ਪਾਰੀ ਦੀ ਜਿੱਤ ਸੀ। ਇਸ ਤੋਂ ਪਹਿਲਾਂ ਭਾਰਤ ਨੇ ਅਕਤੂਬਰ 2018 ਵਿੱਚ ਰਾਜਕੋਟ ਵਿੱਚ ਵੈਸਟਇੰਡੀਜ਼ ਵਿਰੁੱਧ ਇੱਕ ਪਾਰੀ ਅਤੇ 272 ਦੌੜਾਂ ਨਾਲ ਜਿੱਤ ਦਰਜ ਕੀਤੀ ਸੀ।

ਮੈਚ ਵਿੱਚ ਭਾਰਤੀ ਟੀਮ ਨੇ ਆਪਣੀ ਪਹਿਲੀ ਪਾਰੀ 8 ਵਿਕਟਾਂ ‘ਤੇ 564 ਦੌੜਾਂ ‘ਤੇ ਬਣਾ ਕੇ ਐਲਾਨੀ। ਬਾਅਦ ਵਿੱਚ ਅਫਗਾਨ ਟੀਮ ਆਪਣੀ ਪਹਿਲੀ ਪਾਰੀ ਵਿੱਚ 152 ਦੌੜਾਂ ‘ਤੇ ਢੇਰ ਹੋ ਗਈ ਅਤੇ ਉਸ ਨੂੰ ਫਾਲੋਆਨ ਖੇਡਣਾ ਪਿਆ। ਆਪਣੀ ਪਹਿਲੀ ਪਾਰੀ ਦੇ ਆਧਾਰ ‘ਤੇ ਭਾਰਤ ਕੋਲ 412 ਦੌੜਾਂ ਦੀ ਕਾਫ਼ੀ ਲੀਡ ਸੀ। ਫਿਰ ਅਫਗਾਨਿਸਤਾਨ ਦੀ ਦੂਜੀ ਪਾਰੀ 112 ਦੌੜਾਂ ‘ਤੇ ਢੇਰ ਹੋ ਗਈ। ਭਾਰਤੀ ਕਪਤਾਨ ਸ਼ੁਭਮਨ ਗਿੱਲ ਨੇ ਟਾਸ ਜਿੱਤ ਕੇ ਪਹਿਲਾਂ ਬੱਲੇਬਾਜ਼ੀ ਕਰਨ ਦਾ ਫੈਸਲਾ ਕੀਤਾ।

ਫਾਲੋਆਨ ਖੇਡਦੇ ਸਮੇਂ ਵੀ ਅਫਗਾਨ ਟੀਮ ਦੀ ਸ਼ੁਰੂਆਤ ਮਾੜੀ ਰਹੀ। ਅਬਦੁਲ ਮਲਿਕ ਸਿਰਫ਼ 8 ਦੌੜਾਂ ਦੇ ਨਿੱਜੀ ਸਕੋਰ ‘ਤੇ ਮੁਹੰਮਦ ਸਿਰਾਜ ਦਾ ਸ਼ਿਕਾਰ ਬਣੇ। ਇਥੋਂ ਅਫਗਾਨਿਸਤਾਨ ਨੇ ਨਿਯਮਤ ਅੰਤਰਾਲਾਂ ‘ਤੇ ਵਿਕਟਾਂ ਗੁਆ ਦਿੱਤੀਆਂ। ਸਲਾਮੀ ਬੱਲੇਬਾਜ਼ ਸਦੀਕਉੱਲਾ ਅਟਲ ਨੇ ਸਭ ਤੋਂ ਵੱਧ 42 ਦੌੜਾਂ ਬਣਾਈਆਂ। ਰਹਿਮਾਨਉੱਲਾ ਗੁਰਬਾਜ਼ (24 ਦੌੜਾਂ) ਅਤੇ ਰਹਿਮਤ ਸ਼ਾਹ (13 ਦੌੜਾਂ) ਵੀ ਦੋਹਰੇ ਅੰਕੜੇ ਤੱਕ ਪਹੁੰਚੇ। ਸਪਿਨ ਗੇਂਦਬਾਜ਼ ਵਾਸ਼ਿੰਗਟਨ ਸੁੰਦਰ ਨੇ ਚਾਰ ਅਤੇ ਕੁਲਦੀਪ ਯਾਦਵ ਨੇ ਤਿੰਨ ਵਿਕਟਾਂ ਲਈਆਂ। ਸ਼ਰਾਫੁਦੀਨ ਸੱਟ ਕਾਰਨ ਬੱਲੇਬਾਜ਼ੀ ਨਹੀਂ ਕਰ ਸਕਿਆ।

ਅਫਗਾਨ ਟੀਮ ਦੀ ਪਹਿਲੀ ਪਾਰੀ ਵਿੱਚ ਸ਼ੁਰੂਆਤ ਚੰਗੀ ਨਹੀਂ ਰਹੀ। ਖੇਡ ਦੇ ਦੂਜੇ ਦਿਨ ਅਫਗਾਨਿਸਤਾਨ ਨੇ ਪੰਜ ਵਿਕਟਾਂ ਗੁਆ ਦਿੱਤੀਆਂ। ਸਪਿਨਰ ਮਾਨਵ ਸੁਥਾਰ ਨੇ ਅਬਦੁਲ ਮਲਿਕ (16 ਦੌੜਾਂ), ਰਹਿਮਾਨਉੱਲਾ ਗੁਰਬਾਜ਼ (17 ਦੌੜਾਂ) ਅਤੇ ਅਫਸਰ ਜ਼ਜ਼ਈ (3 ਦੌੜਾਂ) ਦੀਆਂ ਵਿਕਟਾਂ ਲਈਆਂ। ਇਹ ਸੁਥਾਰ ਦਾ ਪਹਿਲਾ ਮੈਚ ਸੀ। ਇਸ ਦੌਰਾਨ, ਤੇਜ਼ ਗੇਂਦਬਾਜ਼ ਪ੍ਰਸਿਧ ਕ੍ਰਿਸ਼ਨਾ ਨੇ ਸਿਦੀਕਉੱਲਾ ਅਟਲ (17 ਦੌੜਾਂ) ਅਤੇ ਕਪਤਾਨ ਹਸ਼ਮਤਉੱਲਾ ਸ਼ਾਹਿਦੀ (20 ਦੌੜਾਂ) ਨੂੰ ਆਊਟ ਕੀਤਾ। ਰਹਿਮਤ ਸ਼ਾਹ ਨੇ ਕੁਝ ਪ੍ਰਭਾਵਸ਼ਾਲੀ ਬੱਲੇਬਾਜ਼ੀ ਨਾਲ ਅਫਗਾਨ ਪਾਰੀ ਨੂੰ ਸਥਿਰ ਕਰਨ ਦੀ ਕੋਸ਼ਿਸ਼ ਕੀਤੀ।

ਖੇਡ ਦੇ ਤੀਜੇ ਦਿਨ ਪ੍ਰਸਿਧ ਕ੍ਰਿਸ਼ਨਾ ਨੇ ਅਜ਼ਮਤਉੱਲਾ ਉਮਰਜ਼ਈ (0 ਦੌੜਾਂ) ਨੂੰ ਆਊਟ ਕਰਕੇ ਭਾਰਤੀ ਟੀਮ ਨੂੰ ਸ਼ੁਰੂਆਤੀ ਸਫਲਤਾ ਪ੍ਰਦਾਨ ਕੀਤੀ। ਰਹਿਮਤ ਸ਼ਾਹ ਦੀ ਪ੍ਰਭਾਵਸ਼ਾਲੀ ਬੱਲੇਬਾਜ਼ੀ ਜਾਰੀ ਰਹੀ, ਭਾਰਤ ਵਿਰੁੱਧ ਟੈਸਟ ਮੈਚ ਵਿੱਚ 50 ਜਾਂ ਇਸ ਤੋਂ ਵੱਧ ਦੌੜਾਂ ਬਣਾਉਣ ਵਾਲਾ ਪਹਿਲਾ ਅਫਗਾਨ ਬੱਲੇਬਾਜ਼ ਬਣ ਗਿਆ। ਸ਼ਰਾਫੁਦੀਨ ਅਸ਼ਰਫ (11 ਦੌੜਾਂ) ਨੇ ਰਹਿਮਤ ਦਾ ਸਮਰਥਨ ਕਰਨ ਦੀ ਕੋਸ਼ਿਸ਼ ਕੀਤੀ, ਪਰ ਮਾਨਵ ਸੁਥਾਰ ਨੇ ਉਸ ਦੀ ਪਾਰੀ ਦਾ ਅੰਤ ਕਰ ਦਿੱਤਾ।

ਫਿਰ ਮਾਨਵ ਸੁਥਾਰ ਨੇ ਰਹਿਮਤ ਸ਼ਾਹ ਨੂੰ ਬੋਲਡ ਕਰਕੇ ਆਪਣੀਆਂ ਪੰਜ ਵਿਕਟਾਂ ਪੂਰੀਆਂ ਕੀਤੀਆਂ। ਰਹਿਮਤ ਨੇ 135 ਗੇਂਦਾਂ ‘ਤੇ ਨੌਂ ਚੌਕਿਆਂ ਅਤੇ ਇੱਕ ਛੱਕੇ ਦੀ ਮਦਦ ਨਾਲ 60 ਦੌੜਾਂ ਬਣਾਈਆਂ। ਮਾਨਵ ਸੁਥਾਰ ਇੱਥੇ ਹੀ ਨਹੀਂ ਰੁਕੇ ਅਤੇ ਮੁਹੰਮਦ ਸਲੀਮ ਸਫੀ (0 ਦੌੜਾਂ) ਨੂੰ ਆਊਟ ਕਰਕੇ ਆਪਣਾ ਛੇਵਾਂ ਵਿਕਟ ਲਿਆ। ਜ਼ਿਆਉਰ ਰਹਿਮਾਨ ਸ਼ਰੀਫੀ (6 ਦੌੜਾਂ) ਆਊਟ ਹੋਣ ਵਾਲਾ ਆਖਰੀ ਬੱਲੇਬਾਜ਼ ਸੀ, ਜਿਸਨੂੰ ਵਾਸ਼ਿੰਗਟਨ ਸੁੰਦਰ ਨੇ ਆਊਟ ਕੀਤਾ। ਭਾਰਤ ਲਈ ਸਪਿਨਰ ਮਾਨਵ ਸੁਥਾਰ ਨੇ ਆਪਣੀ ਪਹਿਲੀ ਪਾਰੀ ਵਿੱਚ ਛੇ ਵਿਕਟਾਂ ਲਈਆਂ।