ਭਾਰਤੀ ਫੌਜ ਦਾ ਕਮਾਲ, 12 ਘੰਟਿਆਂ ‘ਚ ਤਿਆਰ ਕੀਤਾ ਹੜ੍ਹ ਨਾਲ ਤਬਾਹ ਹੋਇਆ ਪੁਲ

ਕੁਦਰਤੀ ਆਫ਼ਤ ਦੌਰਾਨ ਦੂਤ ਬਣ ਕੇ ਉਤਰੀ ਫੌਜ ਨੇ ਜੰਮੂ ਵਿੱਚ ਤਵੀ ਨਦੀ ‘ਤੇ ਪੁਲ ਨੂੰ 12 ਘੰਟਿਆਂ ਵਿੱਚ ਬਣਾ ਕੇ ਤਿਆਰ ਕਰ ਦਿੱਤਾ। ਸ਼ੁੱਕਰਵਾਰ ਸਵੇਰੇ ਫੌਜ ਨੇ ਭਗਵਤੀ ਨਗਰ ਵਿੱਚ ਚੌਥੇ ਪੁਲ ਦੇ ਹਿੱਸੇ ‘ਤੇ ਇੱਕ ਅਸਥਾਈ ਪੁਲ ਬਣਾਉਣਾ ਸ਼ੁਰੂ ਕੀਤਾ ਅਤੇ ਲਗਭਗ 12 ਘੰਟਿਆਂ ਦੀ ਸਖ਼ਤ ਮਿਹਨਤ ਤੋਂ ਬਾਅਦ ਸ਼ਾਮ ਨੂੰ ਪੁਲ ਤਿਆਰ ਹੋ ਗਿਆ।

ਟਾਈਗਰ ਡਿਵੀਜ਼ਨ ਦੇ ਜੀਓਸੀ ਮੇਜਰ ਜਨਰਲ ਮੁਕੇਸ਼ ਭਾਨਵਾਲਾ ਖੁਦ ਮੌਕੇ ‘ਤੇ ਪਹੁੰਚੇ। ਉਨ੍ਹਾਂ ਨੇ ਪੁਲ ਦਾ ਨਿਰੀਖਣ ਕੀਤਾ ਅਤੇ ਫੌਜ ਦੀਆਂ ਗੱਡੀਆਂ ਚਲਾ ਕੇ ਇਸ ਦਾ ਉਦਘਾਟਨ ਕੀਤਾ। ਫੌਜ ਨੇ 110 ਫੁੱਟ ਲੰਮਾ ਪੁਲ ਬਣਾਇਆ ਹੈ ਅਤੇ ਪਿਛਲੇ ਤਿੰਨ ਦਿਨਾਂ ਤੋਂ ਬੰਦ ਟ੍ਰੈਫਿਕ ਪ੍ਰਣਾਲੀ ਨੂੰ ਵਾਪਸ ਪਟੜੀ ‘ਤੇ ਲਿਆਂਦਾ ਹੈ। ਹੁਣ, ਭਗਵਤੀ ਨਗਰ ਵਿੱਚ ਤਵੀ ਨਦੀ ‘ਤੇ ਬਣਿਆ ਚੌਥਾ ਪੁਲ ਵਾਹਨਾਂ ਦੀ ਸੁਚਾਰੂ ਆਵਾਜਾਈ ਲਈ ਤਿਆਰ ਹੈ। ਹਾਲਾਂਕਿ, ਫੌਜ ਵੱਲੋਂ ਬਣਾਏ ਗਏ ਇਸ ਪੁਲ ‘ਤੇ ਸਿਰਫ ਇੱਕ ਪਾਸੇ ਦੀ ਆਵਾਜਾਈ ਹੋਵੇਗੀ।

ਜਦੋਂ ਪੁਲ ਤਿਆਰ ਹੋਇਆ ਤਾਂ ਫੌਜ ਦੇ ਜਵਾਨਾਂ ਦਾ ਉਤਸ਼ਾਹ ਆਪਣੇ ਸਿਖਰ ‘ਤੇ ਸੀ, ਅਤੇ ਉੱਥੇ ਮੌਜੂਦ ਲੋਕ ਫੌਜ ਦਾ ਮਨੋਬਲ ਵਧਾਉਣ ਲਈ ਨਾਅਰੇਬਾਜ਼ੀ ਵੀ ਕਰ ਰਹੇ ਸਨ। ਇਸ ਮੌਕੇ ‘ਤੇ ਜੀਓਸੀ ਟਾਈਗਰ ਡਿਵੀਜ਼ਨ ਨੇ ਵੀ ਪੱਤਰਕਾਰਾਂ ਨੂੰ ਸੰਬੋਧਨ ਕੀਤਾ। ਉਨ੍ਹਾਂ ਕਿਹਾ ਕਿ ਮੁਰੰਮਤ ਵਿੱਚ ਸਮਾਂ ਲੱਗਣ ਦੀ ਸੰਭਾਵਨਾ ਦੇ ਕਾਰਨ ਟਾਈਗਰ ਡਿਵੀਜ਼ਨ ਦੇ ਇੰਜੀਨੀਅਰਾਂ ਨੇ ਚੁਣੌਤੀਪੂਰਨ ਹਾਲਤਾਂ ਵਿੱਚ ਹੜ੍ਹਾਂ ਨਾਲ ਭਰੀਆਂ ਸੜਕਾਂ ਅਤੇ ਸੀਮਤ ਕਾਰਜ ਖੇਤਰ ਨੂੰ ਪਾਰ ਕਰਦੇ ਹੋਏ 110 ਫੁੱਟ ਲੰਬਾ ਬੇਲੀ ਬ੍ਰਿਜ ਬਣਾਇਆ

ਪੁਲ 12 ਘੰਟਿਆਂ ਤੋਂ ਵੀ ਘੱਟ ਸਮੇਂ ਵਿੱਚ ਬਣਾਇਆ ਗਿਆ ਸੀ, ਜਿਸ ਨਾਲ ਵਾਹਨਾਂ ਦੀ ਆਵਾਜਾਈ ਸੰਭਵ ਹੋ ਸਕੀ। ਉਨ੍ਹਾਂ ਕਿਹਾ ਕਿ ਭਾਰੀ ਬਾਰਿਸ਼ ਕਾਰਨ ਜੰਮੂ, ਸਾਂਬਾ, ਕਠੂਆ, ਪਠਾਨਕੋਟ ਅਤੇ ਗੁਰਦਾਸਪੁਰ ਵਿੱਚ ਹੜ੍ਹਾਂ ਨੇ ਬੁਨਿਆਦੀ ਢਾਂਚੇ ਨੂੰ ਭਾਰੀ ਨੁਕਸਾਨ ਪਹੁੰਚਾਇਆ। ਲੋਕ ਪ੍ਰਭਾਵਿਤ ਹੋਏ। ਤੁਰੰਤ ਕਾਰਵਾਈ ਕਰਦੇ ਹੋਏ ਭਾਰਤੀ ਫੌਜ ਨੇ ਸਿਵਲ ਪ੍ਰਸ਼ਾਸਨ ਨਾਲ ਨੇੜਲੇ ਤਾਲਮੇਲ ਵਿੱਚ ਇੱਕ ਵਿਸ਼ਾਲ ਬਚਾਅ ਅਤੇ ਰਾਹਤ ਕਾਰਜ ਸ਼ੁਰੂ ਕੀਤਾ। ਦੱਸ ਦੇਈਏ ਕਿ 26 ਅਗਸਤ ਨੂੰ ਭਗਵਤੀ ਨਗਰ ਵਿੱਚ ਬਣੇ ਚੌਥੇ ਪੁਲ ਦਾ ਇੱਕ ਹਿੱਸਾ ਰੁੜ ਗਿਆ ਸੀ, ਉਦੋਂ ਤੋਂ ਆਵਾਜਾਈ ਬੰਦ ਸੀ।